Wy Hans van Gheseken, Hans Mole, Hinrick Klokouw, vorstendere unde sworne der broderschop des hilligen Lichnams der Stuven, belegen in Su^ente Jacobi Kercken binnen Hamborgh, bekennen unde bet u^egen openbar, in unde mit krafft deses breues,

dat wy mit vulbord der oldesten brodern, der ere vulbord to esschede was, hebben entfangen unde gebo^eret van der erliken jungfrouwen Cristinen Warmeloes in dem Convente, veer unde twintich marck pfennige lu^eb. Mu^ente, alse to Hamborgh genge und geve sint, unde desu^elvige veer unde twintich marck penn[ige] hebbe wy gekeret in der vorben[ante] bro^ederschop witlike nuttichheit, dar vore wy erben[ante] vorstendere unde sworne der vorben[ante] broderschop schullen unde willen, unde unse nakomelinge schullen der ehrwerdigen jungvrouwen Carstinen Warmeloes de tyd eres leuendes hantreken, geuen, unde betalen twe marck pennige tor rente uppe twe vasten tyde, alse na ghiffte desses breues ene marck pennige uppe Su^ente Johannes-Dach to middensommer, unde ene marck penninge uppe Wynachten, wol to danke und tor noghe, sunder enigerley togerheringhe, unde wannehr dat dese erbenante Carstine verstoruen is in God dem heren, to scholen desse twe marck renthe mit dem vorben[ante] houetstole egen, qwyd und vrygh toho^eren der broderschop.