Wy Hinrik unde Clawes van der ghnade Ghodes ghreven to Holsten unde Stormeren bekennen an dessem breve, dat wy by vulbord unser erven hebben vorkoft unde vorlaten mid macht desses breves Frederike Hama borgher to Hamborch unde zyne erve teyn mark jarliker rente an unseme tolne to Hamborch, de jarlikes pleghen ut to komen ute deme anderen ghelde to allen sunte Andreas daghe(1) myd der nastanden vorledenen rente, de dar uppbort, de unse vader vor hadde vorpandet unde wy vort Frederike Hama vorkoft hebben vor hundert unde tvintych mark penninghe, dar wy em vore vorlaten to enem ewyghen vrigen ervekope dy vorschrevene teyn mark gheldes to ewyghen tyden, unde wy noch unse erven scholen dar nycht mer upp zaken.

Tho merer vasticheyt zo hebbe wy Hinrik unde Clawes unse inghezeghele henghet laten an dessen breff, de ghegheven is na Ghodes bord dusent jar dryhundert jar unde an deme tweundeveftyghesten jare an sunte Phylyppus unde Iacobus avende.