{Überlieferung}
B = OF 2c, p. 90-91  [olim Registrant des Hochmeisters Konrad von Jungingen, Nro. II, fol. 42v-43r].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 36-37.

{Diplomatische Erörterung des Stücks}
Gleichzeitige Abschrift, Papier.

Demutige befelunge und willigen dinst mit allir behegelichkeit bevor.
Allirdurchluchste furstynne grosmechtige gnedige frauwe, euwern briff uns nuwelichsten gesant by desem euwern boten haben wir wirdiclichen entpfangen und wol vornomen, in dem euwer wirdige grosmechtikeit uns schribet von der geschit, die do leyder in desem somer geschen ist, die uns von ganczen herczen leid ist, und nicht alleine dye, sunder allis das, das wedir euwer irluchtikeit und wedir die euwern ymmer geschit ader geschen mochte. Gnedige frauwe, alz ir uns ouch schribet von dem tage, den der allirdurchluchste furste und herre Erich konig czu Denmarken etc. unser gnediger herre mit euwer riche rate hat ufgenomen czu halden czu Kalmarn uff den Sontag Trinitatis nest komende, begernde, das wir czu dem selben ufgenomen tage sömelich us unsern steten sendten, gnedige frouwe, ir dirkente is von euwern gnaden wol und lutirlichen, das unser stete und die unsern die allirgeringisten sien von den gemeynen steten, die do czu der deutschen hensen gehoren und sie ouch die sache nicht alleyne anrurende ist, sunder sie alle gemeynlichen. Doch so haben wir sie geheysen und nemelichen in befolen, das sie sich in der sachen bewisen sollen und dorynne thun alle ir mogelichkeit, als euwer gnade eren guten willen und ere meynunge wol dirkennen sal in eren briefen.
Euwer grosmechikeit uns ouch schribit umb czene unser gebitiger uf den egenanten tag ouch do hin czu senden. So wisset, gnedige frouwe, das grafe Albrecht von Swarczburg kompthur czu Danczik iczunt bussen landes ist in unser botschaft und wir nichten wissen, uff welche czeit her gewislichen czu huse komen mag. Ouch so ist unser grosscheffer gereit den sienen weg iczunt czu von sienes amptes wegen, und wissen ouch nicht, uff welche czeit her czu huse mag wedirkomen, und wir konnen von keynem andern uff dese czeit gewislichen euwer liebe geschriben.
Sunder gnedige frouwe, mogen sich die sachen geflien und enthangen werden von euwern gnaden wegen und den euwern bis uff die nesten Pfingsten, alz is doch ufgenomen ist von den steten gemeynlich, als uns unser stete vorgelegit haben, die und andere sachen czu handelnde, alz is obirredt ist und vorliebet, dorumb euwer gnade wir begerlichen bitten, wy is denne undirnomen wirt in bescheidenheit. Und was wir mit den unsern dorczu thun sollen, nicht alleine in {S. 37} den dingen sundern in allen andern, euch, euwerm riche und unserm gnedigen herren dem konige mit dienste czu allir behegelichkeit, das welle wir alczeit gerne thun noch unserm mogen. Und befelen uns und unsern orden in euwere beschirmunge.
Geben czu Marienburg an der Mittewochen vor Epyfanie domini anno domini etc. XC septimo.